ШИНЖЛЭХ УХААН, ТЕХНОЛОГИЙН ИХ СУРГУУЛЬ

“Шатах ашигт малтмалын хими, боловсруулалт ба экологийн асуудлууд-2016” сэдэвт эрдэм шинжилгээний бага хурал боллоо

ШУТИС, Хэрэглээний Шинжлэх Ухааны Сургуулийн Химийн Инженерчлэлийн Салбараас Монголын Химийн нийгэмлэгтэй хамтран 2016 оны 11-р сарын 25-нд “Шатах ашигт малтмалын хими, боловсруулалт ба экологийн асуудлууд-2016” сэдэвт эрдэм шинжилгээний ээлжит хурлыг зохион байгуулав. Хурлыг нээж ХИС-ын эрхлэгч доктор (Ph.D) профессор П.Мөнхбаатар, Монголын Химийн Нийгэмлэгийн Ерөнхийлөгч, ШУА-ийн харъяа ХХТХ-ийн Нүүрсний хими-технологийн лабораторийн эрхлэгч ШУ-ы доктор (Sc.D) академич Б.Пүрэвсүрэн, ШУТИС-ийн эрдэм шинжилгээ, инноваци хариуцсан проректор, доктор (Ph.D) дэд профессор Ч. Баасандаш нар мэндчилгээ дэвшүүлэв.

Тус хуралд эрдэмтэн судлаачид нийт 27 эрдэм шинжилгээ, судалгааны ажлыг ирүүлэн хуралд 9 аман, 12 ханан илтгэлийг хэлэлцүүлэн бүтээлийн эмхэтгэл гаргав.

Хуралд ШУТИС-ийн ХШУС, ГУУС, МТС, ЭХС, Монгол Улсын Их сургууль, Монголын Үндэсний Их Сургуулийн эрдэмтэн судлаач багш нар болон докторант, магистрант, бакалавр оюутнууд идэвхитэй оролцсоноос гадна ЭХЯ-ны түлшний бодлогын хэлтсийн мэргэжилтэн доктор Ж.Батбилэг, ШУА-ийн харъяа ХХТХ-ын эрдэм шинжилгээний ажилтнууд, Ашигт малтмал газрын тосны газар, Геологийн төв лаборатори, Зам тээврийн хөгжлийн төв, “Вагнер Ази” ХХК-ы судлаачид олон шинжлэх ухааны ач холбогдол бүхий сонирхолтой илтгэлийг хэлэлцүүлэн нефть, нүүрс, түлш, тосны боловсруулалт ба хэрэглээний асуудлыг хөндөж санал бодлоо солилцож цаашид хамтран ажиллахаар болцгоов.