ШУТИС-ийн Гадаад хэлний сургууль 2009-2010 оны хичээлийн жилээс “Техникийн мэргэжлийн орчуулга” хятад хэлний ангийг нээсэн ба гадаад хамтын ажиллагааны хүрээнд БНХАУ-ын хятад хэл түгээн дэлгэрүүлэх Ханбань байгууллага, Гадаад хэл, хамтын ажиллагааны төвтэй хамтран БНХАУ-аас жил бүр тасралтгүй мэргэжилтэн багш урьж нийт 25 багш ажилласан байна.

2024-2025 оны хичээлийн жил ШУТИС-ийн Гадаад хэлний сургуульд БНХАУ-ын Шандун их сургуулийн профессор Ван Жүнли, багш Панхунчао, Мэдээлэл холбооны их сургуулийн багш Лю Юүтин, Дунхуа ТИС-ийн багш Ян Зү И, Шинан ШУТИС-ийн багш Чю Шинван нар ажиллаж байна.

БНХАУ-аас мэргэжилтэн багш урьж ажиллуулснаар суралцагчдад хятад хэлний мэдлэг, чадвар эзэмших, хятадын ёс уламжлал, соёл түүхийг таниулах, хөтөлбөр амжилттай  хэрэгжихэд хувь нэмрээ оруулсаар байна.

ГХС-ийн хятад хэлний мэргэжилтэн багш нар (2009 – 2024)

2009-2010 оны хичээлийн жилээс Хэлний боловсролын сургууль “Техникийн мэргэжлийн орчуулга” хятад хэлний анги нээгдэн, 2013 онд анхны төгсөлтөөс хойш нийтдээ 150 гаруй оюутан төгсгөсөн байна. Одоо Техник технологийн орчуулга /хятад хэл/ мэргэжлээр 55 оюутан суралцаж байна.

ШУТИС-ийн гадаад хамтын ажиллагааны хүрээнд 2009-2010 оны хичээлийн жилд Монгол улсын ШУТИС, БНХАУ-ын Шаньдун ШУТИС хамтын ажиллагааны гэрээ байгуулснаар Гадаад хэлний сургууль БНХАУ-ын Шаньдун ШУТИС-ийн Олон улсын соёлын солилцооны сургуультай хамтран оюутны дадлагын орчныг бүрдүүлж, суурь баазыг нэмэгдүүлэх, чадварлаг боловсон хүчин бэлтгэх зорилготойгоор хэлний танилцах дадлага болон оюутан солилцооны 1 жилийн хөтөлбөрийг 10 дахь жилдээ амжилттай хэрэгжүүлж байна.

ГХС-аас хэлний танилцах дадлагаар ТТО-хятад хэлний ангийн 76 оюутан, нэг жилийн солилцооны хөтөлбөрөөр шилдэг 2 оюутан хамрагддаг ба нийт 16 оюутан тус бүр амжилттай хамрагдсан байна.  

Гадаад хэлний сургууль 2021-2022 оны хичээлд Шаньдун ШУТИС-тай байгуулсан хамтын ажиллагаагаа өргөжүүлэн А тэтгэлэг-2 оюутан, В тэтгэлэг-8 оюутан, С тэтгэлэг-6 оюутан, тус бүр бүртгэлийн хураамж 600 юаны хөнгөлөлттэй хамрагдахаар 16 оюутан тэтгэлэгтэй суралцах солилцооны шинээр “1+1+2 хөтөлбөр” хэрэгжүүлэх гэрээг амжилттай байгуулж 2022 оны намрын улирлаас эхлүүллээ. 

Тус хөтөлбөрөөр 23 оюутан явсан ба одоо ТТО-хятад хэлний 2-р ангийн 3 дахь ээлжийн 13 оюутан Шандун ШУТИС-т шамдан суралцаж байна.   

Үүнээс гадна ГХС-ийн Ази судлалын салбар 2021-2022 оны хичээлийн жилийн намрын улирлаас Шандун ШУТИС-тай хамтарсан төсөл онлайн олон улсын хятад хэлний сургалтыг 3 жилийн хугацаанд амжилттай хэрэгжүүлж, нийт 208 оюутан хамрагдсан болно.

Хамтран ажилладаг мэргэжилтэн профессор багш нартаа гүнээ талархаж, эрдэм судлалын үйлсэд нь амжилтын дээдийг хүсье!

ГХС-АСТ-Хятад хэлний баг

Бэлтгэсэн: Ц.Эрдэнэзаяа