ШУТИС-ийн “Хос Уянга” цэнгээнт бүжгийн хамтлаг 2014 оны 11 дүгээр сарын 27-28-ний өдрүүдэд “BURLESQUE” тайлан тоглолтоо ШУТИС-ийн Урлаг зааланд хийлээ. Тайлан тоглолтонд нийт 30 гаруй оюутан, арын ажилд 10 гаруй оюутан ажиллаж хамтын хөдөлмөрийн үр шимээр өргөн хүрээний тайлан тоглолтыг сургуулийнхаа удирдлаг, багш, оюутнууддаа тусгай найруулга үзүүлбэрээр үзүүллээ. Тоглолтыг “Хос Уянга” клубийн багш СУИС-ийн төгсөх курсийн оюутан Б.Хандармаа найруулан тавьжээ.
“Хос Уянга” бүжгийн хамтлаг сүүлийн жилүүдэд хүний нөөц дутмаг, үйл ажиллагаанд оролцох, тайлан тоглолт хийх боломж муутай байсан бол өнөөдөр хамтлагийнхаа дэргэд клуб нээн ажиллуулсанаар өөрийн 40 гаруй гишүүнтэй болж үйл ажиллагаа нь өргөжин хөгжсөн байна. Тайлан тоглолтонд ОХҮА-ны дарга Д.Цогзолмаа мэндчилгээ дэвшүүлж “Манай оюутнууд хөгжиж байна. Бид клубийн үйл ажиллагааг дэмжиж, клубүүдэд оюутан багш нарыг багшлуулах бодлого барьж ажилласны үр дүн гарч байна” гэж дүгнэн хэллээ. Тоглолтын үеэр бүрэлдэхүүн сургуулийн захирлууд өөрсдийн оюутнуудаа шагнан урамшууллаа. “Хос Уянга” хамтлагийн ахлагч, ГУУС-ийн оюутан Т.Хатанбаганыг тус сургуулийн талархалаар, Хамтлагийн гишүүн, БАС-ийн оюутан Т.Дөлгөөнзул, ҮТС-ийн оюутан Ж.Даваахүү нарыг захирлын нэрэмжит шагналаар тус тус шагнав.
ШУТИС-ийн Оюутны хөгжил, үйлчилгээний алба оюутнуудыг чөлөөт цагаа зөв боловсон, өөрсдийн сонирхолтой чиглэлийнх нь дагуу хөгжүүлэн төлөвшүүлэх боломжыг олгохоор дэмжин ажиллаж байна. Энэхүү ажлын нэг үр дүн нь цэнгээнт бүжгийн “Хос Уянга” хамтлаг, “Хос уянга” клубийн оюутнууд нэгдэн бэлтгэл сургуулилалтаа хийж, хамтдаа хөгжиж, хамтдаа чадваржиж хамтын бүтээлээ дэлгэн харуулсан явдал байлаа.
ОЮУТНЫ ХӨГЖИЛ, ҮЙЛЧИЛГЭЭНИЙ АЛБА
