“Шинжлэх ухаан, технологи, инноваци – 2017” үзэсгэлэнд 97 байгууллагын эрдэмтэн судлаачдын 300 гаруй бүтээл оролцсоноос академич С.Батмөнхийн судалгааны баг хамт олон, шавь нарынхаа хамтаар бүтээсэн “Илч - 2” дулааны аккумулятор шилдэг бүтээлээр шалгарлаа. Шагналыг БСШУСЯ-ны Төрийн нарийн бичгийн дарга Ж.Болормаа, БСШУСЯ-ны Шинжлэх ухааны бодлогын зохицуулалтын газрын дарга Т.Ган-Эрдэнэ, Шинжлэх ухаан технологийн сангийн захирал Д.Энхжаргал нар гардуулав.

Монгол гэр, жижиг сууцанд зориулсан дулааны аккумулятор (хураагуур) нь шөнийн турш гэрийг дулаан байлгахын зэрэгцээ 9 цагийн туршид хураасан цахилгаанаар өдөр 15 цаг гэрийн дулааныг тогтмол хэмтэй барихад зориулсан бүтээл юм. Энэхүү аккумулятор нь цахилгаан, дулааны өдөр шөнийн ачааллыг тэнцвэржүүлэх, гэр хорооллын хэрэглэгчдэд хүйтний улиралд цахилгааны үнийг тэглэсэн үед ашиглахад нэн тохиромжтой, улс орон, иргэдийн хувьд эдийн засгийн хэмнэлттэй, цаашид нийслэлийн агаарын бохирдлыг шийдэхэд хувь нэмэр оруулах чухал ач холбогдолтой юм.

“Шинжлэх ухаан, технологи, инноваци – 2017” үзэсгэлэнгийн  шилдгээр шалгарсан бусад  бүтээлүүдийн онцлогоос дурьдвал:

• Мал аж ахуйн эрдэм шинжилгээний хүрээлэнгийн эрдэмтэн Ц.Отгоо, Ц.Дэжидмаа, Т.Батсүх, Д.Сангажав нарын зохион бүтээсэн “Уураг, амин дэмээр баяжуулсан эрдсийн шахмал тэжээл” нь өвөл, хаврын улиралд даарч, сульдсан малыг өлчиржүүлэх, тэжээлийн шимт бодисын шингэцийг 20-30 %-иар нэмэгдүүлж, зүй бусын хорогдол 10.2% -иар, амьдын жингийн бууралтыг 12.1-13 %-иар бууруулна.
• “Арьс трейд” ХХК-ийн хэрэгжүүлсэн Ч.Авдай удирдагчтай “Арьс шир боловсруулах процессуудын орчны хэлбэлзлийг тогтворжуулах дэвшилтэт технологи” инновацийн төслийн хүрээнд бий болсон хром хүнд металл давс хүчил агуулаагүй химийн материал ашиглан арьсыг гүн боловсруулах шинэ эко технологи нь үйлдвэрийн технологийн явцад гарч буй хром, хүнд металл, давс, хүхрийн хүчил агуулсан хаягдал усыг зогсоож, саарал усыг гаргах, хүний эрүүл мэндэд хоргүй, байгаль орчинд ээлтэй, хүлэмжийн хийг бууруулах цоо шинэ технологи нэвтрүүлсэн.
• Хими, химийн технологийн хүрээлэнгийн дэргэдэх гарааны “Уужим булган” ХХК-ийн эрдэмтэн Ж.Дугаржав, Д.Алтанхуяг зохиогчтой “Үнэр арилгагч ях бэлдмэл” нь цэвэрлэх байгууламжийн лаг, жорлонгийн бохир, эвгүй үнэрийг арилган хоргүйжүүлэн халдваргүйжүүлнэ.
• Физик технологийн хүрээлэнгийн П.Золбаяр, Ч.Баясгалан, Г.Бат-Эрдэнэ, У.Батхишигт, М.Бат-Орших зохиогчтой “Усан халаалтын зуухны автомат хяналт, удирдлагын систем” нь Улаанбаатар хотын гэр хорооллын айл өрхөөс үүдэлтэй утаат агаарын бохирдлыг бууруулах зорилготой зохион бүтээсэн усан халаалтын зуухыг бүрэн автоматжуулсан техник, програмыг хосолсон биет бүтээл
• Хууль сахиулахын их сургуулийн Эрдэм шинжилгээ, хөгжлийн хүрээлэнгээс хэрэгжүүлсэн доктор Б.Бат-Эрдэнэ удирдагчтай “Гэмт хэргийн статистикийг боловсронгуй болгох” Шинжлэх ухаан, технологийн төслийн хүрээнд судлаач Б.Мөнхдоржийн боловсруулсан “Хорих ялыг дүйцүүлэн хасаж тооцоход хэрэглэх математик статистикийн аргачлал” бүтээл тус тус шилдгээр шалгарав.

ЭРДЭМ ШИНЖИЛГЭЭ, ИННОВАЦИЙН ГАЗАР

Утас: 11-318153