Монгол Улсад нисэх хүчин үүсэж хөгжсөний 100 жилийн ойг тохиолдуулан Монгол Улсын Ерөнхийлөгч Ухнаагийн Хүрэлсүх зарлиг гаргаж, Шинжлэх ухаан технологийн их сургуулийн МИТС гурван багш төрийн дээд гавьяат цол, шагнал хүртээлээ.

• Монгол Улсын Нисэхийн гавьяат техникч цолоор
  МИТС-ийн нисэхийн профессор, ахмад багш, дэд хурандаа Буриадын Гомбосүрэн
• Монгол Улсын Шинжлэх ухааны гавьяат зүтгэлтэн цолоор
  МИТС-ийн багш, доктор (Ph.D), профессор, бэлтгэл хурандаа Батзоригтын Эрдэнэбат
  МИТС-ийн зөвлөх багш, техникийн шинжлэх ухааны доктор (Sc.D), профессор, бэлтгэл хурандаа Шаравын Бямбаа нар тус тус шагнагдсан.

2025 оны 6 дугаар сарын 3-ны өдөр ШУТИС-ийн Ректорын зөвлөлийн бүрэлдэхүүн шагнал хүртсэн эрхэм багш нарыг хүлээн авч, хүндэтгэл үзүүллээ.

Буриадын Гомбосүрэн нь нисэхийн инженерийн боловсролыг үндэслэгчдийн нэг бөгөөд МИТС-д олон арван жилийн турш багшилж, инженер, техникч мэргэжилтэн бэлтгэх үйлсэд үнэтэй хувь нэмэр оруулсан ахмад багш юм.

Батзоригтын Эрдэнэбат нь цэргийн нисэх хүчин болон техникийн боловсролын салбарт олон жил үр бүтээлтэй ажилласан, хурандаа цолтой эрдэмтэн багш бөгөөд эрдэм шинжилгээний ажлаа бодит амьдралд нэвтрүүлж, салбарын хөгжилд үнэтэй хувь нэмэр оруулсан судлаач юм.

Шаравын Бямбаа нь техникийн шинжлэх ухааны доктор, профессор бөгөөд МИТС-ийн зөвлөх багшийн хувиар олон жилийн турш инженер, техникийн боловсролын хөгжил, судалгааны арга зүйд манлайлан ажилласан нэрт эрдэмтэн. Түүний удирдлага дор хамгаалсан олон залуу эрдэмтэн өнөөдөр төрөлх сургуулийнхаа сургалт, судалгаанд амжилттай ажиллаж байна.

Шагнагдсан эрхэм багш нартаа ШУТИС-ийн хамт олны нэрийн өмнөөс халуун баяр хүргэж, эрүүл энх, эрдмийн ариун үйлсдээ улам их амжилт гаргахын өлзийтэй ерөөлийг өргөн дэвшүүлье!