Монгол Улсын Шинжлэх ухаан, технологийн их сургууль нь их сургуулийн урт хугацааны санхүүгийн тогтвортой байдлыг хангах, хөгжлийн стратегийн үйл ажиллагааг дэмжих зорилготой “Эндаументын сан”-г олон улсын жишигт нийцүүлэн байгууллаа. Япон улсын үйлдвэрийн автоматжуулалтын тэргүүлэгч групп компани болох “SMC” корпорац 2.5 тэрбум төгрөгийн анхны хандивыг хандивлаж цаашид хамтран ажиллахаар боллоо.

Энэхүү хамтын ажиллагааг баталгаажуулан 2025 оны 12 дугаар сарын 12-ны өдөр “Эндаумент санд хөрөнгө оруулж хамтран ажиллах” тухай гэрээнд ШУТИС-ийн Ректор Т.Намнан, SMC Корпорацийн ерөнхийлөгч Ёшида Такада нар гарын үсэг зурлаа.

Эндаумент сангийн анхны томоохон хөрөнгө оруулалтыг:

• ШУТИС-ийн оюутнуудыг Япон улсад инженерийн мэргэжлээр дадлагажих хөтөлбөрт хамруулах (Internship)
• Их сургуулийн хөгжлийн стратегид тусгагдсан сургалт, судалгаа, инновацын үйл ажиллагааг дэмжих
• Их сургуулийн дэд бүтцийг дэмжих зэрэг бодлогын үйл ажиллагаанд урт хугацаанд үр дүнтэй зарцуулах талаар талууд тохиролцов.  

“Эндаументын сан”-д хөрөнгө оруулалт татаж буй энэхүү үйл явдал нь Монголын дээд боловсролын тогтвортой санхүүжилтийн шинэ хуудсыг нээж, их сургууль нь зөвхөн сургалтын төлбөрөөс хамааралгүйгээр, судалгаа, инновацыг дэлхийн түвшинд хөгжүүлэхэд чухал алхам юм.

ШУТИС-ийн зүгээс цаашид “Эндаументын сан”-гийн үйл ажиллагааг тогтвортой явуулж төгсөгчид, аж ахуйн нэгж, бизнесийн байгууллагатай хамтран ажиллаж хандивлагч, хөрөнгө оруулагчдаас өгсөн хөрөнгийг хүлээн авч, хадгалах, өсгөх замаар, их сургуулийн урт хугацааны санхүүгийн тогтвортой байдал болон хөгжлийн стратегийг хэрэгжүүлэн ажиллана.