Боловсролыг дэмжих жилийн хүрээнд мэргэжлийн болон техникийн боловсролын салбарын хөгжлийн чиг хандлага, тулгамдсан асуудлыг судалгаанд суурилан хэлэлцэж, бодлогын санал, зөвлөмж боловсруулах зорилготой олон улсын эрдэм шинжилгээний хурал ШУТИС-ийн VIII байрны Олон улсын хурлын танхимд зохион байгуулагдаж байна.

Хурлын нээлтийн үйл ажиллагаанд Монгол Улсын Их Хурлын гишүүн, Засгийн газрын гишүүн, Боловсролын сайд Л.Энх-Амгалан оролцож, “Монголын хүүхэд, залуусыг мэдлэг, ур чадварын хоцрогдлоос чөлөөлье” сэдвээр илтгэл хэлэлцүүллээ.

Энэхүү олон улсын хурал нь эрдэм шинжилгээний өгүүлэл хэлэлцүүлэх, хэвлүүлэх, ханын (постер) илтгэл танилцуулах, мөн зочин илтгэгч, судлаачаар оролцох боломжийг багш, эрдэмтэн судлаачдад бүрдүүлж буйгаараа онцлог юм.

Хуралд Боловсролын яам, Боловсролын ерөнхий газар, ЮНЕСКО-ийн Монгол дахь төлөөлөгчийн газар, KOICA олон улсын байгууллага, STREAM II төсөл, Монголын Үндэсний Худалдаа Аж Үйлдвэрийн Танхим, Монголын Инновацын холбоо, ШУТИС, МУИС болон мэргэжлийн болон техникийн боловсролын сургалтын байгууллагуудын төлөөлөл, эрдэмтэн судлаачид оролцож байна.

Тус хуралд мэргэжлийн болон техникийн боловсролын салбарын 43 сургалтын байгууллага, 6 их, дээд сургуулийн нийт 145 төлөөлөгч оролцож байгаа бөгөөд хурлын үйл ажиллагаа нэгдсэн болон салбар хуралдаан, ханын илтгэлүүдээр үргэлжилж байна.

Олон улсын эрдэм шинжилгээний нэгдсэн хуралдаанд дараах илтгэлүүд хэлэлцүүлэгдэв. Үүнд:

• “Vocational and Technical Education Policy and Governance” ЮНЕСКО-ийн Монгол дахь төлөөлөгчийн газрын мэргэжилтэн М.Шахидул Ислам
• “Development of Korea Vocational Training System & Mongolia Application Strategy”  KOICA байгууллагын сайн дурын багш Юн Мин Ху
• “Germany’s Dual Education System” STREAM төслийн ХАА-н зөвлөх Дийтмар Валдорф
• “ШУТИС-ийн сургалтын нэгдмэл агуулга” ШУТИС-ийн Сургалт эрхэлсэн проректор, доктор (PhD), профессор Н.Эрдэнэхүү
• “МБС-ын салбар дахь инновацын хөгжлийн чиг хандлага” Монголын Инновацын холбооны тэргүүн, доктор (ScD), профессор Л.Оюунцэцэг
• “Боловсролын салбарын цаашдын хандлага, нөхцөл байдал, хэрэгжүүлэх арга хэмжээ” СЭЗИС-ийн профессор, доктор (PhD), профессор Г.Батхуяг

Мөн Боловсролын сайд Л.Энх-Амгалан “TVET START UP-2026” цогц арга хэмжээг хамтран зохион байгуулж, судалгаа, инновацын соёл, энтрепренер сэтгэлгээг хөгжүүлэхэд хувь нэмэр оруулсан ШУТИС-ийн Политехник коллеж болон Монгол-Солонгосын Политехник коллежийн хамт олонд талархал гардууллаа.

Олон улсын эрдэм шинжилгээний хурлыг Боловсролын яам, Боловсролын ерөнхий газар, ШУТИС-ийн Политехник коллеж, Монгол-Солонгосын Политехник коллеж, Техникийн болон мэргэжлийн боловсролын сургуулиудын холбоо, Монголын Инновацын холбоо хамтран зохион байгуулж байна.