ШУТИС болон Уралын Холбооны Их сургуулийн хамтын ажиллагааны гэрээний дагуу ШУТИС-ийн төлөөлөгчид 2016 оны 05-р сарын 22-ноос 28-ны хооронд Уралын Холбооны Их сургуульд ажлын айчлал хийлээ. Төлөөлөгчид сургалт, эрдэм шинжилгээний чиглэлээр хамтран ажиллах, багшлах боловсон хүчний мэргэжил дээшлүүлэх, оюутны зуны дадлага зэрэг асуудлуудаар хамтарсан уулзалт, ярилцлага хийж дараах үр дүнд хүрлээ.

1. ЭХС-ийн Дулааны инженерийн салбарын харъяа “Үйлдвэр, хотын дулаан хангамж” мэргэжлээр магистрын хамтарсан 1+1 хөтөлбөрийг хэрэгжүүлэхээр тохиролцон гарын үсэг зурагдав.
2. БАС-ийн Хүрээлэн буй инженерийн салбарт харъяалагдах “Ус хангамж, ус цэвэрлэгээ” мэргэжлээр, МИС-ийн Машин үйлдвэрлэлийн салбарт харъяалагдах “Машин үйлдвэрлэлийн технологи”, “Металл судлал, технологи” мэргэжлүүдээр магистрын хамтарсан 1+1 хөтөлбөрүүдийг хэрэгжүүлэхээр тохиролцов.
3.  Дээрх  хөтөлбөрүүдэд  хамрагдах оюутнуудын  орос хэлний бэлтгэлийг Гадаад хэлний сургуулиас хариуцан ажиллахтай  холбогдуулан орос хэлний  салбар, тэнхимүүдтэй уулзаж сургалтын хөтөлбөрийн агуулгыг тохиролцсон ба оросын талаас  ГХИ-д орос хэлний бэлтгэл анги нээх  санал дэвшүүлснийг хүлээн авсан.
4. Уулзалтын явцад Русский мир сангийн санхүүжилтээрхамтарсан судалгаа хийх төсөл боловсруулж хэрэгжүүлэх мөн хамтарсан сурах бичиг зохиох зэрэг асуудлыг харилцан тохиролцов.

ШУТИС-ийн талаас ажлын багийн бүрэлдэхүүнд ЭХС-ийн дэд захирал Д.Өлзий-Орших, Дулааны инженерийн салбарын эрхлэгч Д.Цэрэндолгор, ДИС-ын зөвлөх профессор С.Батмөнх, ГХИ-ын Европ судлалын тэнхмийн эрхлэгч Г.Туяа, МИС-ийн Машин үйлдвэрлэлийн салбарын дэд профессор О.Галаа, БАС-ийн Хүрээлэн буй инженерийн салбарын ахлах багш Ц.Цацрал нар ажиллав.