БШУЯ, ШУА, ШУТИС, ШУТС, МЗЭХ болон ТИЗСН-ээс техник, технологийн салбарын залуу судлаачдын дунд “Хүрэлтогоот” эрдэм шинжилгээний хурлыг 16 дахь жилдээ амжилттай зохион байгууллаа. Энэ жилийн “Хүрэлтогоот-2020” эрдэм шинжилгээний хурал 2020 оны 12 дугаар сарын 16-ний өдөр цахим хэлбэрээр зохион байгуулагдсан бөгөөд хурлын үйл ажиллагаанд 60 гаруй залуу эрдэмтэн судлаачид, албаны хүмүүс оролцлоо.

“Хүрэл тогоот-2020” олон улсын хуралд Япон, Турк, ОХУ, БНСУ, ХБНГУ, БНХАУ, Монгол зэрэг улсаас нийт 100 гаруй залуу эрдэмтэн, судлаачдын 41 бүтээл ирүүлснээс анхан шатны шалгаруулалтаар 85 судлаачдын 31 бүтээлийг эмхэтгэн олон нийтэд толилуулж байгаа бөгөөд дараагийн шатанд 10 илтгэл шалгарч хэлэлцүүлсэн.

ШУТИС-ийн харьяа Хөнгөн үйлдвэрийн судалгаа, хөгжлийн хүрээлэнгээс залуу судлаачид дараах 3 эрдэм шинжилгээний өгүүллээр тус хуралд оролцсоноос 2 бүтээл шилдэг 10-т шалгарлаа.

1. Э.Дагвасүрэн, Г.Батчимэг “Ноолууран сүлжмэл бүтээгдэхүүний эцсийн гүйцэтгэн боловсруулалтын технологийн судалгаа”
2. Ц.Ганболд, Г.Надмид “Монгол хаан ширхэгт-Борлонгийн ноолуур”
3. Ч.Батсүрэн, С.Цэрэндулам “Ургамлын био бэлдмэлээр Монгол хонины ноосон ээрмэлийг боловсруулах технологийн судалгаа”.

Эдгээр эрдэм шинжилгээний өгүүллүүд нь:

• Европын Холбооны санхүүжилтээр НҮБ-ын Аж үйлдвэр хөгжлийн байгууллагаас Монгол Улсын Засгийн газар, Хүнс, хөдөө аж ахуй, хөнгөн үйлдвэрийн яам, НҮБ-ын Хүнс, хөдөө аж ахуйн байгууллагатай хамтран хэрэгжүүлж буй “Монгол Улсад Хөдөлмөр эрхлэлтийг дэмжих (SECiM C2)” төслийн хүрээнд “Текстилийн үйлдвэрлэлд сүлжмэлийн гүйцэтгэн боловсруулалтын стандарт ажиллагааны зааварчилгаа ба сургалтын хөтөлбөрийг боловсруулж хэрэгжүүлэх нь” (2019-2020) сэдэвт дэд төсөл,
• “Богино ширхэгттэй ноолуураар ээрмэл үйлдвэрлэх оновчтой шийдэл” (2016-2018) шинжлэх ухаан технологийн төсөл,
• “Нэхмэлийн үйлдвэрийн хими технологийн боловсруулалтад хэрэглэдэг зарим материалыг байгалийн гаралтай түүхий эдээр орлуулан хэрэглэх технологийн судалгаа” (2016-2018) шинжлэх ухаан технологийн төслийн үр дүнд бий болсон бүтээлүүд юм.

Эрдэм шинжилгээний хуралд оролцсон нийт залуу судлаачдадаа шинжлэн судлах, бүтээн байгуулах их үйлсэд нь өндөр амжилт хүсэн ерөөе.

Хөнгөн үйлдвэрийн судалгаа хөгжлийн хүрээлэн