ШИНЖЛЭХ УХААН, ТЕХНОЛОГИЙН ИХ СУРГУУЛЬ

"Оюутан цэрэг" цэргийн мэргэжил олгох сургалтын бүртгэлийг сунгалаа

2025-03-13 15:28

2025 оны "Оюутан цэрэг" цэргийн мэргэжил олгох сургалтын бүртгэлийг сар шинийн баяр давхацсантай холбогдуулан гуравдугаар сарын 14-ний өдрийг хүртэл сунгах шийдвэрийг Батлан хамгаалах яамнаас гаргалаа.
Энэхүү шийдвэртэй холбогдуулан энэ сарын 10-ны өдрийн 17 цагийн байдлаар тасалбар болгон "Дээд боловсролын мэдээллийн сан"-гаас оюутнуудын мэдээллийг татах юм. Иймээс мэдээллийн санд мэдээллээ оруулаагүй хоцроосон магадлан итгэмжлэгдсэн дээд боловсролын сургалтын байгууллагууд оюутнуудын мэдээллийг яаралтай оруулах шаардлагатай байна.
Цахимаар бүртгүүлж байгаа оюутнуудын хувьд "Оюутны мэдээлэл олдсонгүй" гэсэн алдаа гарсан тохиолдолд гар утасны "E-Mongolia" аппликейшнээ шинэчлэх, их, дээд сургуулийнхаа сургалт, оюутны албатайгаа холбогдож тодруулна уу.
Сургалтад хамрагдах оюутнууд дараах шалгуурыг хангасан байх шаардлагатай.

Магадлан итгэмжлэгдсэн дээд боловсролын сургалтын байгууллагын 1, 2, 3 дугаар дамжаанд эсхүл мэргэжлийн болон техникийн боловсролын сургалтын байгууллагад суралцдаг байх;
Тухайн жилийн 6 дугаар сарын 15-ны өдрөөс өмнө 18 нас хүрсэн байх;
Эрүүл мэндийн даатгал сүүлийн 1 жилд төлсөн байх;
Сурлагын голч дүн 2,8 ба түүнээс дээш байх;

Бүртгэл явагдаж дууссаны дараагаар тэнцсэн эсхүл тэнцээгүй талаар мэдээллийг цахимаар хүргүүлэх бөгөөд тэнцсэн оюутнууд сургуулийнхаа харьяалах аймаг, дүүргийн цэргийн штабт энэ сарын 11-ний өдрийн 08:00 цагаас эхлэн биеэр очиж, цэрэгт татагдагчийн анкет (4 дүгээр маягт) бөглөнө. Үүний дараагаар тухайн цэргийн штабаас дараагийн шатны сонгон шалгаруулалт хаана, хэзээ болох талаарх мэдээллийг өгөх юм.