ШИНЖЛЭХ УХААН, ТЕХНОЛОГИЙН ИХ СУРГУУЛЬ

“Кибер аюулгүй байдлын хүний нөөцийг хөгжүүлэх төсөл” хэрэгжүүлэх гэрээнд гарын үсэг зурлаа

Монгол Улсын Засгийн газар, Японы олон улсын хамтын ажиллагааны байгууллага /ЖАЙКА/-н Нарийвчилсан төлөвлөлтийн судалгааны багтай хамтран Монгол улсад “Кибер аюулгүй байдлын хүний нөөцийг хөгжүүлэх төсөл”-ийг хэрэгжүүлэхээр болсон. Уг төслийн гэрээнд Монгол Улсыг төлөөлж Цахим хөгжил, харилцаа холбооны яамны Төрийн нарийн бичгийн дарга Б.Болор-Эрдэнэ, ШУТИС-ийн Мэдээлэл, холбооны технологийн сургуулийн захирал Н.Чулуунбанди, ЖАЙКА-ийн Нарийвчилсан судалгааны багийн дарга Идэ Хироюуки нар 2022 оны 06 сарын 16-ны өдөр гарын үсэг зурлаа. Энэхүү төслийг кибер аюулгүй байдлын чиглэлээр мэргэжилтэн бэлтгэдэг ШУТИС-ийн МХТС-д тулгуурлан хэрэгжүүлэх юм.

Төслийн хүрээнд

Кибер аюулгүй байдлын мэргэжлийн боловсон хүчнийг бэлтгэхэд дэмжлэг үзүүлэх
Иргэд, олон нийтэд кибер аюулгүй байдлын талаарх ойлголт, мэдлэгийг түгээх,
“Цахим орчин дахь хүүхэд хамгаалал”-ын протокол үйлдэх
Төрийн албанд ажиллаж буй мэдээллийн технологийн мэргэжилтнүүдийг чадавхжуулах сургалт зохион байгуулах зэрэг ажлуудыг хэрэгжүүлэхээр төлөвлөж байна.

Төслийг хэрэгжүүлэхэд Цахим хөгжил, харилцаа холбооны яам, Удирдлагын академи, МУИС, Дотоод хэргийн их сургууль, Үндэсний дата төв, И-Монгол академи зэрэг байгууллагууд оролцох бол Япон улсын талаас төслийн хэрэгжилтэд шаардлагатай бүхий л заавар, зөвлөгөөг өгч ажиллах юм.