ШИНЖЛЭХ УХААН, ТЕХНОЛОГИЙН ИХ СУРГУУЛЬ

“АЗИЙН ГҮҮР 2024” тэмцээнд амжилттай оролцож “Тэргүүн байр” эзлэв

Азийн орнуудын их, дээд сургуулийн барилга, автозам, гүүрийн инженер мэргэжлээр суралцаж буй оюутнуудын дунд зохион байгуулагддаг “Asia Bridge 2024” тэмцээн нь 2024.08.26-29-ний өдрүүдэд Вьетнам улсын Кан То Их Сургууль (Can Tho University)-д амжилттай болж өндөрлөв. Уг тэмцээнд Япон, Тайланд, Тайван, Индонез, Вьетнам, Монгол зэрэг улсуудын нийт 21 баг 150 гаруй оюутнууд оролцлоо.

Оролцогч багууд “АЗИЙН ГҮҮР” тэмцээний дүрмийн дагуу бодит гүүрийн жижигрүүлсэн хувилбар болох 4,2м урттай, ‎‎60см өргөнтэй ган гүүрийг өөрсдөө тооцож төсөллөн, тэмцээний талбайд угсарч, ачааллаж ‎уралдах ба Угсралтын өртөг, Бүтээцийн өртөг, Нийт өртөг, Гоо зүй, Илтгэл болон Хотойлтын ‎урьдчилсан тооцоо зэрэг төрлүүдэд оюун ухаан, бүтээлч сэтгэлгээ, авхаалж самбаа, ур чадвараа ‎сорин өрсөлддөг.

‎Гүүр зохион бүтээх тэмцээн нь анх 1980-аад онд АНУ-д оюутнуудын дунд зохион ‎байгуулагдаж эхэлснээс хойш 1992 онд Америкийн Барилгын Инженерүүдийн Нийгэмлэгээс ‎үндэсний хэмжээний тэмцээн болгон өргөжүүлж жил бүр мужийн тэмцээнд түрүүлсэн багууд ‎улсын хэмжээний тэмцээнд оролцох эрх авдаг нэр хүндтэй тэмцээн болсон байна. ‎Манай улсын хувьд 2017 оноос эхлэн профессор П.Отгонбаяр, М.Оюунчимэг нарын санаачлагаар оролцож эхэлсэн түүхтэй.

Уг тэмцээнд оролцож байсан түүхээс дурдвал:

2017 онд Тайланд улсад болсон тэмцээнд профессор П.Отгонбаяр, дэд профессор М.Оюунчимэг нараар удирдуулсан баг “Хотойлтын таамаглал” төрөлд “Тэргүүн байр”; Ахлах багш Б.Эрдэнэболдын удирдсан баг нийлбэр дүнгээр "Дөрөвдүгээр байр";
2018 онд Тайланд улсад болсон тэмцээнд ахлах багш доктор Т.Мөнх-Өнөр, багш Э.Даваахүү нараар удирдуулсан баг нийлбэр дүнгээр “Дөрөвдүгээр байр”;
2019 онд Индонез улсад зохиогдсон тэмцээнд профессор Я.Дүйнхэржав, ахлах багш доктор О.Алтанзагас нараар удирдуулсан баг нийлбэр дүнгээр “Тэргүүн байр”; Ахлах багш Б.Эрдэнэболдын удирдсан баг нийлбэр дүнгээр "Гуравдугаар байр";
2023 онд Тайланд улсад зохиогдсон тэмцээнд ахлах багш Н.Гэрэлтцолмон, ахлах багш доктор С.Пүрэвдорж нараар удирдуулсан баг нийлбэр дүнгээр “Гуравдугаар байр;
2024 онд Вьетнам улсад зохиогдсон тэмцээнд багш Б.Жавхлан, багш С.Энхболд нараар удирдуулсан баг нийлбэр дүнгээр “Тэргүүн байр;

‎Энэ жилийн багийн бүрэлдэхүүнд БАС-ийн захирал доктор Б.Нарантуяа, БИС-ын ахлах багш Н.Гэрэлтцолмон, ахлах багш доктор О.Алтанзагас, багш Б.Жавхлан, багш С.Энхболд болон барилгын инженерчлэлийн 3, 4-р курсын нэр бүхий долоон оюутнууд орсон. Түүнчлэн “Азийн гүүр 2025” тэмцээнийг эх орондоо зохион байгуулах эрхийг БАС-ийн захирал доктор Б.Нарантуяа албан ёсоор гардан авч зохион байгуулалтын ажлаа эхлүүлээд байна. “Азийн гүүр 2024” тэмцээнд амжилт гаргахад бүх талын дэмжлэг үзүүлсэн БАС-ийн захиргаа, БИС-ын хамт олон, ивээн тэтгэгч байгууллага, багийн бүрэлдэхүүндээ чин сэтгэлийн талархал илэрхийлье!