ШИНЖЛЭХ УХААН, ТЕХНОЛОГИЙН ИХ СУРГУУЛЬ

Хятад–Монголын хамтарсан “МОЗИ” лаборатори өнөөдөр албан ёсоор нээгдлээ

2025 оны 4 дүгээр сарын 2-нд Монгол Улсын Шинжлэх Ухаан, Технологийн Их Сургууль (ШУТИС)-ийн Механик инженер, тээврийн сургуульд Хятад–Монголын хамтарсан “МОЗИ” лаборатори өнөөдөр албан ёсоор нээгдлээ.

Тус лаборатори нь Монгол Улсын Засгийн газраас хэрэгжүүлж буй “Боомтын сэргэлт” бодлогын хүрээнд тээвэр, логистикийн салбарт шаардлагатай мэргэжилтэн, инженерүүдийг бэлтгэхэд бодитой хувь нэмэр оруулах стратегийн ач холбогдолтой юм. Нээлтийн үйл ажиллагаанд “Нэг бүс – Нэг зам” Олон Улсын Хөгжлийн Академийн захирал ноён Лю Яцун, ШУТИС-ийн ректор, доктор, профессор Т.Намнан, БНХАУ-ын Ляонин мужийн Төмөр Замын мэргэжлийн дээд сургуулийн проректор, профессор Жао Мин, Хятадын төмөр замын нэгдүгээр группийн Монгол дахь салбар хариуцсан захирал Жан Жиндөү, ШУТИС-ийн Механик инженер, тээврийн сургуулийн захирал Н.Пүрэвдорж нар оролцлоо. ШУТИС-ийн багш, судлаачид, оюутнуудын төлөөлөл оролцож, мэндчилгээ дэвшүүлэв.

Нээлтийн үйл ажиллагааны үеэр ШУТИС-ийн ректор Ректор Т.Намнан хэлсэн үгэндээ:
“МОЗИ лаборатори нь орчин үеийн техник, технологид суурилсан сургалтын орчныг бүрдүүлээд зогсохгүй, Монгол–Хятадын боловсрол, шинжлэх ухааны хамтын ажиллагааны бат бэх гүүр болно гэдэгт итгэлтэй байна” хэмээн онцоллоо.

Тус лаборатори нь төмөр замын инженерчлэл, логистикийн чиглэлээр практик орчинд суурилсан сургалт, судалгаа явуулах юм. Энэхүү төсөл нь 2023 оны 9 дүгээр сард байгуулсан дөрвөн талт Харилцан ойлголцлын санамж бичгийн хүрээнд 1.2 тэрбум төгрөгийн өртөгт бүхий 24 нэр төрлийн, 100 гаруй тоног төхөөрөмжийг нийлүүлээд байна. Энэхүү санамж бичигт ШУТИС, “Нэг бүс – Нэг замын Олон Улсын Хөгжлийн Академи” (BRI), Ляонин Төмөр Замын Мэргэжлийн Техникийн Коллеж (LNRVTC), мөн Хятадын Төмөр Замын Нэгдүгээр Группийн “Мидвест Ази” компани нэгдэн оролцсон билээ.

Цахилгаан болон дизель зүтгүүрийн симуляторууд (HXD3C, HXN3)
Зүтгүүрийн жолоодлогын симуляцийн программ хангамж
Өндөр хүчин чадалтай оюутан, багшийн компьютерүүд
75 инчийн ухаалаг самбар, мультимедиа дэлгэцүүд
Логистикийн сургалтын зориулалт бүхий тоног төхөөрөмжүүд багтаж байна.

МОЗИ лаборатори нь ШУТИС-ийн сургалтын чадавхыг нэмэгдүүлэх, төмөр зам болон логистикийн салбарын олон улсын түвшний мэргэжилтнүүдийг Монголдоо бэлтгэхэд үнэтэй хувь нэмэр оруулах юм.