ШИНЖЛЭХ УХААН, ТЕХНОЛОГИЙН ИХ СУРГУУЛЬ

БНСУ-ын Сөүлийн үндэсний шинжлэх ухаан технологийн их сургуультай (SeoulTech) 2+2 хөтөлбөрийн гэрээг шинэчлэн баталлаа.

БНСУ-ын Сөүлийн үндэсний шинжлэх ухаан технологийн их сургуультай (SeoulTech)

2+2 хөтөлбөрийн гэрээг шинэчлэн баталлаа.

2025 оны 9 дүгээр сарын 24-нд Сөүлийн үндэсний шинжлэх ухаан технологийн их сургуулийн Ректор Ким Донхван тэргүүтэй төлөөлөгчид ШУТИС-д айлчиллаа.

ШУТИС-ийн талаас Ректор Т. Намнан, Сургалт, оюутны хөгжил эрхэлсэн проректор Н. Эрдэнэхүү, Хөгжлийн бодлого, дижитал шилжилт эрхэлсэн проректор Р. Бадмаанямбуу, Механик инженер, тээврийн сургуулийн захирал Н. Пүрэвдорж, Менежментийн сургуулийн захирал Г. Баттүвшин болон холбогдох профессор, багш нар оролцож, хоёр тал хамтарсан хөтөлбөрийн гэрээг шинэчлэн баталлаа.

Энэхүү гэрээ нь ШУТИС-ийн Менежментийн сургуулийн Бизнесийн удирдлага хөтөлбөр болон Механик инженер, тээврийн сургуулийн Механик инженерчлэл хөтөлбөрийн хүрээнд хэрэгжиж байна. Энэ хөтөлбөрийн дагуу 2025 онд Бизнесийн удирдлагын хөтөлбөрийн 8, Механик инженерийн хөтөлбөрийн 1 нийт 9 оюутан Солонгост суралцахаар явсан бөгөөд өмнөх жилүүдэд Бизнесийн удирдлагын хөтөлбөрөөр 2 оюутан амжилттай төгсч, хос диплом эзэмшсэн байна.

Хөтөлбөрт хамрагдсан оюутнууд ШУТИС-д эхний хоёр жилийн хугацаанд ерөнхий суурь, мэргэжлийн суурь болон мэргэшлийн хичээлээс нийт 65 кредит, түүнчлэн 36 кредитийн солонгос хэлний сургалтыг дүүргэнэ. Үүний дараа Сөүлийн үндэсний шинжлэх ухаан технологийн их сургуулийн солонгос хэлний шалгуур болон ярилцлагад тэнцсэн тохиолдолд Солонгост дахин 65 кредит үзэж, нийт 130 кредит эзэмшсэнээр хоёр сургуулийн хос диплом авах боломжтой юм.

Уулзалтын үеэр дараах асуудлуудыг хэлэлцэв:

Солонгос хэлний шаардлага:
Бизнесийн удирдлагын хөтөлбөрт хамрагдах оюутнуудад TOPIK шалгалтын 4-р түвшинд тэнцэх шаардлага тавигддаг. Хэрэв оюутан TOPIK 3 түвшинд тэнцсэн бол Солонгост 6 сарын хугацаанд хэлний бэлтгэлд хамрагдаж шалгуурыг давсны дараа мэргэжлийн хичээлээ үзэх боломжтой. Харин TOPIK 4 түвшинтэй оюутнууд шууд 3 дугаар курсээс суралцаж эхэлнэ. Иймээс TOPIK 3 түвшинтэй оюутнуудад Солонгост очсоны дараа хэлний курсийн нэмэлт зардал гарахыг анхаарах шаардлагатай.
Хөтөлбөрийн өргөжүүлэлт:
Ректор Т. Намнан 2+2 хөтөлбөрийн хүрээнд ШУТИС-ийн бусад мэргэжлийн хөтөлбөрүүдийг хамруулах, цаашид магистр болон докторын түвшний хөтөлбөрүүдийг хэрэгжүүлэх саналыг дэвшүүлэв.
SeoulTech Global Center байгуулах талаар:
Солонгосын тал оюутнуудыг Солонгост суралцахаар явахын өмнөх бэлтгэл сургалтыг хангах зорилгоор SeoulTech Global Center байгуулах саналыг тавьсан бөгөөд ШУТИС энэ асуудлыг судлан үзэж, дүрэм журамд нийцүүлэн шийдвэрлэхээр болов.