ШИНЖЛЭХ УХААН, ТЕХНОЛОГИЙН ИХ СУРГУУЛЬ

Архитектурын салбарын 40 жилийн ойг өргөн дэлгэр тэмдэглэв

Архитектор мэргэжилтэн бэлтгэж эхэлсний болон тэнхим бие даан байгуулагдсаны түүхт 40 жилийн ойг БИАС-ийн Архитектурын профессорын багийн багш, оюутнууд 2013 оны 11 дүгээр сарын 29-ний өдөр урлаг зааланд тэмдэглэн өнгөрүүллээ.

Ойн хүрээнд ахмад багш Б.Даажавын хөдөлмөр алдрыг тэмдэглэж, уулзалт зохион байгуулав. Тус багийн багш, доктор Ж.Энхтүвшин, Ш.Энхтунгалаг болон салбарын оюутнуудын хамтарсан уран бүтээлийн "Хос жигүүр" үзэсгэлэнг МУЭ-ийн үзэсгэлэнгийн танхимд гаргав. Р.Эрдэнэхоролоо, К.Оливияа, Э.Пүрэв-Эрдэнэ, С.Амгалан, И.Гончигбат нар "Хот төлөвлөлтийн үндэс" сурах бичиг орчуулж хэвлэсэн, Ш.Энхтунгалаг "Заха Хадид 21-р зууны Архитектур дахь эрх чөлөө" номыг хэвлүүлсэн, дэд профессор Ж.Гомбын "Хотжихуйн онол", Н.Нямжавын "Архитектурын хар ба уран зураг" номууд хэвлэлтэнд бэлэн болов. Ойд зориулсан Салбарын 40 жил сэдэвт эрдэм шинжилгээний хуралд багш, докторууд хот байгуулалт, архитектур, сургалтын чиглэлээр нийт 12 илтгэл тавьж хэлэлцүүлж, 3 илтгэлийг шалгаруулж урамшуулав. Нийт 450 орчим төгсөгчид, зочид төлөөлөгчид оролцсон нэгдсэн уулзалтанд ШУТИС-ийн ректор Б.Очирбат, БИАС-ийн захирал П.Отгонбаяр нар оролцож баяр хүрглээ.