ШИНЖЛЭХ УХААН, ТЕХНОЛОГИЙН ИХ СУРГУУЛЬ

Хүний биеийн 3D хэмжил зүйн лабораторийн нээлт боллоо

Монгол Улсын Засгийн газар, Үйлдвэр, хөдөө аж ахуйн яамны захиалга, Азийн хөгжлийн банкны Хөдөө аж ахуй, хөдөөгийн хөгжлийн төслийн 220.0 мянган долларын санхүүжилтээр ШУТИС-ийн Үйлдвэрлэлийн технологийн сургуулийн Хувцас судлалын төвд 2014 оны 10 дугаар сарын 3-ны өдөр хүний биеийн 3D хэмжилтийн лаборатори байгуулагдаж, нээлтээ хийлээ.

Энэхүү лаборатори нь хүний бие, гар, хөлийн хэмжилтийг 3D хэмжээст хэмжилтээр гүйцэтгэх тоног төхөөрөмжүүдээр тоноглогдсон бөгөөд:

Монгол хүний биеийн хэмжээ, хэлбэрийг анх удаа 3 хэмжээст хэмжигдэхүүнээр тодорхойлох
Монгол хүний бие, гар, хөлийн хэмжээний үндэсний мэдээллийн сан үүсгэх
Хүний бие, гар, хөлийн хэмжээ, хэлбэрийн ангилал боловсруулах
Монгол хүний биеийн хэмжээ, хэлбэрийн үндэсний стандарт боловсруулах
Монгол хүний аватар (хэмжилтээр үүссэн дүрсээс нэмэлт хэмжилтүүд хийх боломжтой)-г бий болгох эрдэм шинжилгээ, судалгааны ажлуудыг олон улсын стандартад нийцүүлэн гүйцэтгэх боломж бүрдэж байна.

Нээлтийн арга хэмжээнд ҮХААЯ-ны Хөнгөн үйлдвэрийн бодлогын хэрэгжилтийг зохицуулах газрын орлогч дарга С.Рэгзэдмаа, ҮХААЯ мэргэжилтэн Н.Нарангэрэл, Азийн хөгжлийн банкны захирал н.Түвшинсанаа, Азийн хөгжлийн банкны төслийн зохицуулагч Я.Нармандах, Азийн хөгжлийн банкны Монгол дахь суурин төлөөлөгч Роберт Шулхаммер, ШУТИС-ийн ЭШТ-ийн проректор Ч.Баасандаш, ШУТИС-ийн ҮТС-ийн захирал Ж.Туяацэцэг, ШУТИС-ийн ҮТС-ийн дэд захирал Д.Ариунболор, ШУТИС-ийн ҮТС-ийн Дизайны тэнхимийн эрхлэгч Д.Түмэнболд, ШУТИС-ийн ҮТС-ийн Текстил судлалын тэнхимийн дэд профессор Т.Амаржаргалан, ШУТИС-ийн ҮТС-ийн Текстил судлалын тэнхимийн дэд профессор П.Булга ШУТИС-ийн ҮТС-ийн Текстил судлалын тэнхимийн багш, ажилтан, оюутнууд оролцлоо.