ШИНЖЛЭХ УХААН, ТЕХНОЛОГИЙН ИХ СУРГУУЛЬ

Япон Улсын Коосэнгийн Агентлаг Монгол Улсад Коосэн загварын сургууль байгуулахад дэмжлэг үзүүлнэ

Монгол Улсын БШУЯ-ны зүгээс Японы Коосэнгийн Агентлагт япон загварын Коосэнгийн сургалтыг Монголд нэвтрүүлэхэд хамтран ажиллах хүсэлт тавьсны дагуу Япон Улсын Коосэнгийн Агентлагийн ерөнхийлөгч Кобатакэ Хидэфүми, тус агентлагийн ТУЗ-ийн гишүүн, Сэндай Коосэнгийн захирал Үчида Тацүо, Цүрүока Коосэнгийн захирал, Коосэнгийн агентлагийн Монголыг дэмжих багийн ахлагч Като, Коосэнгийн агентлагийн гадаад харилцааны албаны дарга Кацүхира нар 11 дүгээр сарын 25-ны өдөр ШУТИС-д зочиллоо. Тэднийг ШУТИС-ийн ректор Б.Очирбат, Эрдэм шинжилгээ технологий проректор Ч.Баасандаш, ШУТИС-ийн Технологийн дээд сургуулийн захирал А.Ганбаяр, Гадаад харилцааны албаны дарга Т.Ууганбаяр, ахлах мэргэжилтэн Ө.Батбаатар, мэргэжилтэн М.Болортуяа нар хүлээн авч уулзлаа.

Өнгөрсөн оны 11 дүгээр сарын 18-нд Л.Гантөмөр сайдыг Японд айлчилсан цагаас хойш Япон Улсын Коосэнгийн Агентлаг Монголыг дэмжих ажлын хэсэг байгуулан ажиллаж байна гэнэ. Японы засгийн газрын зүгээс олгож буй иений хөнгөлөлттэй зээлээр оюутан суралцуулах, Японы нийт Коосэнгийн хүчин туслалцаатайгаар Коосэн загварын сургалтыг Монголд нэвтрүүлэхэд шаардлагатай туслалцаа дэмжлэгийг үзүүлэх болно гэдгээ хэллээ.

Мөн Японы Коосэнгийн хөтөлбөр, сурах бичиг, заах арга зүйг танилцуулахын зэрэгцээ багшлах боловсон хүчнийг дадлагажуулах зэргээр Монголын талтай уялдаа холбоотойгоор хамтран ажиллах ажээ.