ШИНЖЛЭХ УХААН, ТЕХНОЛОГИЙН ИХ СУРГУУЛЬ

Эврика-2015" эрдэм шинжилгээний XXII их хурлын гранпри шагналыг Ө.Бүрэнжаргал 2-дахь удаагаа хүртлээ

Монгол Улсын Их Хурлын даргын ивээл дор уламжлал болгон зохион байгуулагддаг “Эврика-2015” залуу багш, оюутны эрдэм шинжилгээний их хурал 2015 оны 4 дүгээр сарын 16-ны өдөр амжилттай болж өндөрлөлөө. Монгол Улсын Их Хурлын дарга Зандаахүүгийн Энхболд тус их хурлын хаалтын арга хэмжээн доролцож, шилдэг багш, оюутны гранпри шагналыг гардууллаа. "Эврика-2015" эрдэм шинжилгээний XXII их хурлын гранпри шагналыг ШУТИС-ийн ГУУС-ийн ахлах багш Ө.Бүрэнжаргал 2-дахь удаагаа хүртлээ.

“Эврика” эрдэм шинжилгээний хурлыг Монголын Залуучуудын холбооноос 22 дахь жилдээ зохион байгуулж байна. Харин УИХ-ын даргын ивээл дор 3 дахь жилдээ зохион байгуулагдаж байгаа бөгөөд энэ жилээс их хурал болон хүрээгээ тэлжээ. Тус их хурлын салбар хуралдаанууд 3 дугаар сарын 30-наас 4 дүгээр сарын 3-ны хооронд амжилттай болж өндөрлөсөн юм. Эрдэм шинжилгээний хх хурал нь гурван үе шаттайгаар улс даяар явагдсан бөгөөд сургуулийнхаа эрдэм шинжилгээний хурлаас шалгарсан 339 оюутан, 90 багш хоёрдугаар шатанд оролцжээ. Эдийн засаг, бизнес, техник технологи-мэдээллийн технологи, нийгмийн ухаан, хууль-хууль эрхзүй, газарзүй-геологи, экологи-хөдөө аж ахуй, байгалийн ухаан, анагаах ухаан зэрэг 9 салбарын хүрээнд судалгааны бүтээлүүдийг өрсөлдүүлснээс гуравдугаар шатанд 9 багш, 48 оюутны 27 бүтээл шалгарсан байна.

Өнөөдрийн нэгдсэн хуралдаанаар салбар бүрээс шалгарсан шилдэг илтгэлүүдийг хэлэлцүүлж, 1 залуу багш, 1 оюутны бүтээлийг шилдгээр тодруулж, гранпри шагнал гардуулсан. “Эврика 2015” эрдэм шинжилгээний их хурлын шилдэгийн шилдэг багшаар газарзүй, геологийн салбарт “Баруун өмнөд Монголын цээлийн террейны хувирмал чулуулгын дулааны хувьсал болон Төв Азийн Ороген бүсийн гүний чулуулгийн түрэлтийн хоорондын хамаарал” сэдэвт илтгэлээрээ оролцсон ШУТИС-ийн Геологи Уул Уурхайн СургуулийнГеологи, Гидрогеологийн тэнхимийн ахлах багш Ө.Бүрэнжаргал шалгарч, УИХ-ын дарга З.Энхболд гранпри шагналыг гардуулсан юм. Дашрамд дурьдахад Ө. Бүрэнжаргал нь “Эврика-2014”-т мөн адил гранпри шагнал хүртсэн бөгөөд энэ жил уг амжилтаа дахин батлалаа.Шилдэгийн шилдэг оюутанаарМУИС-ийн оюутан Б.Буянхишиг анагаах ухааны чиглэлээр “Үсхий ортууз /Oxytropis Lanata (Pall) DC/ ургамлын ацетилхолинэстреза ферментийг дарангуйлах идэвхийн судалгаа” сэдвээр шалгарч, гранпри шагнал хүртлээ.